‘हरिबहादुरको जुत्ता’ को शुभमुहूर्त सम्पन्न

काठमाडौं । चर्चित हास्य-अभिनेता हरिवंश आचार्यको कथा रहेको चलचित्र ‘हरिबहादुरको जुत्ता’ को शुभमुहूर्त सम्पन्न भएको छ ।

सरस्वती पूजाको अवसर पारेर सूर्यविनायक मन्दिरमा स्क्रिप्ट र क्यामरा पूजा गर्दै चलचित्रको औपचारिक छायांकन सुरू गरिएको हो । दिपेन्द्र के खनालको निर्देशनमा तयार हुने यस चलचित्रको मुहूर्त समारोहमा कलाकारहरू हरिवंश आचार्य, प्रियंका कार्की, स्वस्तिमा खड्का, किरण केसी, निर्देशक खनाल, निर्माता सरोज ओली, मोहित आचार्यलगायत उपस्थित थिए । निर्देशक खनालसँग हरिवंशको यो पहिलो सहकार्य हो ।

चलचित्रमा प्रकाश सपूत पनि मुख्य भूमिकामा छन् । तर, मुहूर्तमा भने उनी देखिएनन् । अभिनेता हरिवंश आचार्यले जन्मथलो काभ्रेको पनौतीस्थित शंखुबाट ‘हरिबहादुरको जुत्ता’ को छायांकन थालेका छन् ।

निर्माण टीमका अनुसार ४५ दिनसम्म यो चलचित्रको छायांकन हुनेछ । चलचित्रमा हरिवंशसँगै प्रकाश सपुत, स्वस्तिमा खड्का, प्रियंका कार्की, किरण केसी, मुरलीधरको शीर्ष भूमिका हुनेछ । चलचित्रलाई सरोज ओली र मोहितवंश आचार्यले निर्माण गर्दैछन् भने चलचित्र एसएम मोसन पिक्चर्सको ब्यानरमा बन्नेछ ।

चलचित्रको प्रदर्शन मिति भने घोषणा गरिएको छैन ।