कास्की र काठमाडौंपछि रवि रुपन्देही धाउनुपर्ने, १७ जनामाथि संगठित अपराधमा मुद्दा दायर

रुपन्देही । कास्की र काठमाडौं जिल्ला अदालतबाट धरौटीमा छाडिएका राष्ट्रिय स्वतन्त्र पार्टी (रास्वपा)का सभापति एवं पूर्वगृहमन्त्री रवि लामिछानेलाई अब रुपन्देही आउनुपर्ने भएको छ । रुपन्देहीस्थित सुप्रिम सहकारी ठगीको मुद्दा दर्ता गरिएकाले अब उनी रुपन्देही जिल्ला अदालतमा हाजिर हुनुपर्ने भएको हो ।

रविसमेत मुछिएको सहकारी ठगी प्रकरणमा जिल्ला प्रहरी कार्यालय, चितवन र पर्साले पनि अनुसन्धान अन्तिम चरणमा पुर्याएका छन् । रुपन्देहीमा सकिएपछि चितवनमा र त्यसपछि पर्सामा मुद्दा दर्ता गर्ने सरकारी वकिलको तयारी छ । पार्टी स्रोतका अनुसार रवि सम्भवतः आइतबार रुपन्देही जानेछन् ।

कास्की जिल्ला अदालतले धरौटीमा छाडेकै दिन रुपन्देही प्रहरीले मुद्दा दर्ताका लागि जिल्ला सरकारी वकिल कार्यालय रुपन्देहीमा प्रतिवेदन बुझाएको थियो ।

जिल्ला सरकारी वकिल कार्यालय रुपन्देहीले बुटवलको सुप्रिम बचत तथा ऋण सहकारीको रकम अपचलनसम्बन्धी अभियोजन आज दर्ता गरेको हो । पूरक अभियोजन भने समय अभावका कारण भोलि दर्ता हुने भएको छ ।

यसअघि सरकारी वकिल कार्यालयले आजै दुवै अभियोजन दर्ता गर्ने तयारी गरेको थियो । गत वैशाख ३ गते सुप्रिम सहकारीका पूर्वअध्यक्ष एवं संरक्षक गितेन्द्रबाबु राईसहितका २८ जनाविरुद्ध मुद्दा दर्ता भएको थियो ।

उक्त मुद्दा सहकारी ठगीसम्बन्धी मात्र रहेकोमा बिहीबार १७ जनालाई संगठित अपराध पनि थप गरेर मुद्दा दर्ता गरिएको जिल्ला सहन्यायाधिवक्ता एवं सूचना अधिकारी उमाकुमारी केसीले बताइन् ।

‘रवि लामिछाने, छविराज जोशीसहित जोडिएको पूरक जाहेरीअनुसारको अभियोजन शुक्रबार दर्ता गर्छौं,’ उनले भनिन्, ‘पूरक अभियोजन पनि बिहीबार नै दर्ता गर्ने प्रयास समय अभावका कारण सम्भव भएन । रुजु गरेर सकिएको छ, भोलि नै दर्ता हुन्छ ।’

सुरु मुद्दाका २८ जनामध्ये १७ जनालाई संगठित अपराध अभियोजन थप गरिएको र ११ जनालाई ठगीमै मुद्दा चल्ने उनले बताइन् ।

थप र पूरक अभियोजनमा ४२ जनाबाट १ अर्ब १२ करोड रुपैयाँ माग दाबी गरिएको छ । सुप्रिम सहकारीका १० हजार ३ सय ९१ जनाले बचत गरेको १ अर्ब ३१ करोडमध्ये ८६ करोड १८ लाख रुपैयाँभन्दा बढी रकम अपचलन भएको थियो । त्यसमध्ये १४ करोड रुपैयाँभन्दा बढी रकम गोर्खा मिडिया नेटवर्कमा गएको बताइएको छ ।

लामिछाने काठमाडौंमा जस्तै रुपन्देही पनि आफै उपस्थित हुने भएका छन् । गत बिहीबार कास्कीको पोखरास्थित सूर्यदर्शन सहकारी ठगीको मुद्दामा कास्की अदालतले ६५ लाख धरौटीमा रिहा गर्न आदेश दिएको थियो ।

कास्की सरकारी वकिल कार्यालयले सूर्यदर्शन सहकारीको मुद्दामा पुर्पक्षका लागि थुनामा नजाने आदेश भएमा प्रहरीको जिम्मा लगाइदिन माग गरे पनि अदालतले उनलाई धरौटीमा रिहा गर्ने आदेश दियो । रविलाई काठमाडौँ प्रहरी परिसरमा हाजिर हुने कागज गराएर कास्की प्रहरीले बिहीबार रिहा गरेको थियो । त्यसको ४ दिनपछि आइतबार रवि काठमाडौँ अदालतमा हाजिर भएका थिए ।

इलाका प्रहरी कार्यालय बुटवल, रूपन्देहीले सुप्रिम सहकारी ठगीको दोस्रो चरणको अनुसन्धान सकेर गत बिहीबार नै प्रहरीलाई रायसहितको प्रतिवेदन बुझाएको थियो ।

त्यसको एक सातापछि सरकारी वकिल कार्यालयले अदालतमा मुद्दा लगेको हो । रविविरुद्ध २ करोड १० लाख बढी बिगो कायम गर्न प्रहरीले राय दिएको थियो । त्यसमा बिगो केही थपघट हुने देखिएको सरकारी वकिल कार्यालय स्रोतले जानकारी दिएको छ ।

नेपाल प्रहरीका पूर्वडीआईजी एवं रविका व्यावसायिक साझेदार छविलाल जोशीलाई पनि दोस्रो चरणको मुद्दामा प्रतिवादी बनाउन लागिएको छ ।

उनलाई पनि रविलाई जति नै बिगो कायम गर्ने तयारी छ । यहाँ पनि सहकारी ठगी र संगठित अपराधको कसुरमा अभियोग दायर हुने आंकलन गरिएको छ । सम्पत्ति शुद्धीकरणमा भने कास्की अदालतमै मुद्दा दायर भइसकेकाले अन्यत्र नचलाइने भएको छ ।

रुपन्देहीमा यसअघि बयानका लागि रवि छामिछानेलाई कास्कीबाट ल्याइएको थियो । त्यो बयानमा उनले आफूले सहकारीबाट रकम नलिएको भन्दै विषय इन्कारी दिएका छन् ।