रवि पक्षका वकिलको बहस- गोर्खा मिडियामा पैसा आएको रविलाई थाहा थियो, अवैध भन्ने थिएन

पोखरा । पोखराको सूर्यदर्शन सहकारी ठगी प्रकरणमा पक्राउ परेका रास्वपा सभापति रवि लामिछाने पक्षको बहस सकिएको छ । जिल्ला अदालत कास्कीको न्यायाधिश नीतिज राईको इजलासमा सोमबारबाट सुरु भएको रवि पक्षको बहस मंगलबार सकिएको थियो ।

सोमबार रवि पक्षबाट पूर्व महान्यायाधिवक्ता रमन श्रेष्ठसहित वरिष्ठ अधिवक्ता सुशील पन्त र सुरेन्द्र थापाले बहस गरेका थिए । मंगलबार थप ८ अधिवक्ताले बहस गरेसँगै रवि पक्षको बहस सकिएको हो ।

रवि पक्षबाट वरिष्ठ अधिवक्ता राजेन्द्र सेढाईंं, डा. नारायण घिमिरे, रोहितराज बास्तोलासहित डा. नारायणदत्त कँडेल, सुनिता राउत, सुरज बस्नेत, सुदीप पन्त र सञ्जय गोलेले बहस गरेका हुन् । वरिष्ठ अधिवक्ता राजेन्द्र सेढाईंले रवि लामिछानेलाई गोर्खा मिडियामा पैसा आएको भन्ने थाहा भएको तर, अवैध भन्ने थाहा नभएको बताए ।

‘उहाँ (राजेन्द्र) ले गोर्खा मिडियामा पैसा आएको कुरा रवि लामिछानेलाई थाहा थियो । तर, उक्त पैसा गैरकानुनी हो भन्ने थाहा थिएन भनेर भन्नुभयो,’ बहस सहभागी एक अधिवक्ताले भने । अधिवक्ता सेढाईले सरकारले रविलाई जसरी पनि मुद्दा लगाउनुपर्छ भन्ने नियतले अगाडि बढेको दाबी गरे ।

‘जुन जुन मुद्दा लगाएपनि हुन्छ । जसरी पनि रविलाई मुद्दा लगाउनुपर्छ भन्ने नियत राखेर नेपाल सरकारले मुद्दा लगायो । यो ठिक थिएन’, उनले भने ।

वरिष्ठ अधिवक्ता नारायण घिमिरेले मुद्दा दर्तालाई प्रश्न गरे । उनले कानुनलाई तोडमोड गरेर हद म्याद नभएको मुद्दा दर्ता हुन नसक्ने दाबी गरे । सम्पत्तिको स्रोत खुलाउने अवसर नै नदिई सुम्पत्ति शुद्धीकरणको मुद्दा लगाएको उनको आरोप छ ।

उनले इजलासमा भने, ‘रवि लामिछानेलाई सम्पत्ति शुद्धीकरण मुद्दा लगाइयो । त्यो सम्पत्तिको स्रोत के हो भनेर अथवा सम्पत्तिको स्रोत खुलाउने मौका दिनुपर्थाे । जुन अवसर उहाँलाई दिइएन त्यो गलत हो ।

सुरज बस्नेतले शेयर किनेको वैधानिकता भएको र यो संगठित अपराध नहुने तर्क गरे । अधिवक्ताले सञ्जय गोलेले रविले गोर्खा मिडियासँगको सम्झौताअनुसार काम गरेकाले गोर्खा मिडियासँग मात्र जवाफदेहीता हुने बताए ।

‘उहाँ (रवि)ले गोर्खा मिडिया नेटवर्कका कार्यकारी अध्यक्षसँग गरेको सम्झौताबमोजिमको कार्य गर्नुभएको हो । सम्झौता बमोजिमको काम गरेपछि त उहाँको जवाफदेहिता गोर्खा मिडियासँग मात्र हो नि । सहकारीप्रति उहाँको कुनै जवाफदेहिता हुँदैन’, उनले भने । रविका पक्षबाट बहस गर्ने अन्य अधिवक्ताले पनि रविलाई सहकारी मुद्दामा जोड्न नदिने तर्क गरेका थिए ।

मंगलबार नै प्रतिवादी रामबहादुर खनालको सुरु भएको छ । रामबहादुरको तर्फबाट अधिवक्ता विरेन्द्र केसी र उज्वलशंकर सापकोटाले बहस गरेका हुन् । बुधबार रामबहादुरका अधिवक्ताबाटै बहस सुरु हुनेछ ।

त्यसपछि गण्डकी प्रदेशकी पूर्व सांसद मीना गुरुङ, पूर्व सञ्चालक कृष्णबहादुर गुरुङ, पूर्वकोषाध्यक्ष आरती गुरुङका वकिलको बहस हुनेछ । बहस गरेपछि सरकारी वकिलले जवाफी बहस हुनेछ । जवाफी बहसपछि न्यायाधीशले आदेश दिनेछन् ।