कविता : जित्नुपर्छ

चुनाव लागेको छ बेस्सरी
दलहरूलाई
नेताहरूलाई, कार्यकर्ता त भ्याई नभ्याईमा छन् कोही फेसबुकमा कोही ट्वीटरमा
कोही अखबारका पानामा
अचेल टेलिभिजनका भित्ताहरूमा
विचार पोख्नेहरू लाइन लागेका छन्
मानौं दसैँ-तिहारपछि मंसिरको मुरी भित्रयाउनेजस्तै गरी लागिपरेका छन् ।

लेखकहरू लडिरहेछन्
पत्रकार भिडिरहेछन्
उद्योगी अनि व्यवसायीहरू मरिमेटी रहेछन्
शिक्षक, कर्मचारीहरू उफ्रेका उफ्र्यै छन्
सेना गुपचुप लागेकै छन्,
श्रीमान्‌हरू ढोका थुनेर, साउती गरेर खासखुस गर्दै छन्
डाक्टरहरू एस्थेथेस्कोप झुण्ड्याउँदै
लागिपरेका छन् ।

भारत, चीन अनि महाशक्तिहरू पनि भिडिरहेछन्
उनीहरूलाई जिताउनु छ कुनै अमुक दललाई,
हराउनु छ कुनै अमुक दललाई
तर यहाँ हार्न उठेकै छैनन् कोही पनि
मात्र कोही हराउनै भए पनि उठेका छन्
कोही भने जीत्नै उठेका छन्
त्यसैले कोही टाउकोको मूल्य तोक्नेहरू
कोही गोली ठोक्नेहरू
कोही हलो जोत्नेहरू
कोही पार्टी फोड्नेहरू उठेका छन् ।

यो निर्वाचनमा फेरि एक पटक
कसै न कसैले अवश्य जित्नेछ
अबिरको माला लाउनेछ
बधाई खानेछ र ऊ माननीय हुनेछ
अनि ऊ मन्त्री पनि हुनेछ
सायद प्रधानमन्त्री पनि बन्नेछ होला !

तर, म भन्छु
यस पटकको निर्वाचनमा
नेपालको मिचिएको सिमानाले जित्नुपर्छ
सिमानामा भत्किएको पुलले जित्नुपर्छ
सिमानामा गोली खाएको सपूतले जित्नुपर्छ
यो देशको स्वाभिमानले जित्नुपर्छ
चुच्चे नक्साले जित्नुपर्नेछ
नाकाबन्दीमा रोएको मेरो देशले जित्नुपर्छ ।

मैले यस निर्वाचनमा
त्यस्ता कोही कसैले हारेको देख्नु नपरोस्
एक गाँस खानको लागि
एक पेट पाल्नैका लागि
साहुको ऋण तीर्नैका लागि
एउटा झुपडी बनाउनैका लागि
साउदी, कतार र मलेसिया
भासिनेहरूले यसपटक हार्न नपरोस् ।

म ठोकुवा गरेरै भन्छु यसपटक
देशमा अशान्ति मच्चाउनेहरू
गोली-बारुद पड्काउनेहरू
बाँदरमुढेमा नरसंहार मच्चाउनेहरू
पार्टी फोडुवाहरू
डलरका खेती गर्नेहरू
परमादेशीहरू,
गठबन्धनेहरू
एमसीसीहरू
नागरिकता बेच्नेहरू
देशको स्वाभिमान र सम्प्रभुता बन्धकी राख्नेहरूलाई
जिताउने हैन, धुलो पीठो पार्नुछ
तिनीहरूलाई हराउनुछ
पछार्नु छ कहिल्यै उठ्न नसक्ने गरी
लडाउनु छ ।

र, यस पटक
ठेलागाडामा पानीपुरी बेच्नेहरू
सडकमा मकै पोल्नेहरू
थाप्लोमा भारी बोक्नेहरू
रातो दिन पसिना बगाउनेहरू
तराईको बाढीमा बग्नेहरू
पहाडको पहिरोमा पर्नेहरू
मेरा देश भक्तहरू
अनि स्वभिमानीहरूले मात्र हैन
मेरा वृद्ध बा-आमाहरूले
मज्जाले जित्नुपर्छ
सुखी नेपाली समृद्ध नेपालको सपना देख्नेहरूले
जित्नुपर्नेछ
उनीहरूलाई नै जिताउनु छ ।