काठमाडौं। बंगलादेशविरुद्ध बुधवार भएको खेलमा ह्याट्रिक गरेपछि यति बेला चर्चामा छन्, नेपाली राष्ट्रिय फुटबल टोलीका स्ट्राइकर अञ्जन विष्ट।
उनकै तीन गोल मदतमा नेपालले दशरथ रंगशालामा बंगलादेशलाई ३-१ गोलले हरायो र लगातार पाँच खेलको पराजय यात्रामा पूर्ण विराम लगायो ।
अञ्जनले सिनियर अन्तर्राष्ट्रिय फुटबलमा १० गोल गरेका छन् । नेपालका लागि अन्तर्राष्ट्रिय गोल गर्ने खेलाडीको कीर्तिमान बराबरी गर्न उनी तीन गोलले मात्र पछाडि छन् ।
हेटौँडाका अञ्जन एन्फा एकेडेमीका उत्पादन हुन् । उनका सहोदर दाइ रञ्जन पनि फुटबलर हुन् । रञ्जन पनि एन्फा एकेडेमीका उत्पादन हुन् । कुनै समय राष्ट्रिय टोलीमा सँगै रहेका यी दाजुभाइमध्ये रञ्जनले भने राष्ट्रिय टोलीमा स्थान बनाउन संघर्ष गरिरहनु परेको छ।
रञ्जनले नेपालका लागि २ खेल मात्र खेलेका छन् भने अञ्जनले ५० खेलको कोसेढुंगा पुरा गरेका छन् । रञ्जनले सन् २०१६ मा सिनियर अन्तर्राष्ट्रिय फुटबलमा डेब्यु गरेका थिए । उनले बंगलादेशसँग भएको त्यस खेलमा अन्तिम १७ मिनेट खेलेका थिए ।
त्यही वर्ष उनले मालदिभ्ससँग पनि अन्तिम ११ मिनेट खेलेका थिए । उनी पहिलो रोजाइको मिडफिल्डरमा दरिन सकेनन् । उनी अन्य ८ खेलमा टोलीमा रहेर पनि मैदान उत्रन सकेनन् ।
रञ्जन अन्तिम पटक सन् २०१९ को मार्चमा राष्ट्रिय टोलीमा थिए । त्यसयता उनी टोलीमा अँटाउन सकेका छैनन्। उनले गत सिजन न्युरोड टिम (एनआरटी)बाट ए डिभिजन लिग खेलेका थिए।
Leave a Reply