काठमाडौं । काठमाडौंको जोरपाटीमा बोरिङ खन्ने क्रममा ग्यास निस्किएको छ ।
अचानक ग्यास निस्किएपछि खानी तथा भूगर्भ विभागले निरीक्षण गरेको छ ।
ग्यास हेर्न आउनेको भीडका कारण जोरपाटी-बौद्ध, जोरपाटी-सुन्दरीजल, जोरपाटी-दक्षिणढोका सडकखण्डमा चल्ने सवारीसाधन अस्तव्यस्त भएका छन् ।
बोरिङ खन्ने क्रममा मिथेन ग्यास निस्किएको भूगर्भ विभागका ग्यास शाखा प्रमुख तथा वरिष्ठ भूगर्भविद् पृथ्वी लाल श्रेष्ठले नेपाल प्रेसलाई जानाकारी दिए ।
काठमाडौंमा कहिलेकाहीँ मिथेन ग्यासको ‘क्याभिटी’ बनेर बस्नु स्वभाविक रहेको र संयोगवश सोही ठाउँमा बोरिङ्ग खन्दा ग्यास माथि आएको उनको भनाइ छ ।
‘यो सामान्य घटना हो, काठमाडौं जस्तो ठाउँमा कतै कतै एउटै ठाउँमा यसरी ग्यास जम्मा भएर बसेको हुन सक्छ सोही ठाउँमा खन्दा त्यो ग्यास बाहिर निस्केको हो, यो प्रेसर कुकरबाट ग्यास बहिर गए जस्तो मात्र हो गयो सक्कियो । पछिपछि यही ठाउँमा फेरी त्यसरी नै ग्यास आउला वा यो ग्यासकै खानी होला भन्ने चाँही होइन’, उनले भने ।
Leave a Reply