काठमाडौं । २५ वर्ष पुरानो गोपिकृष्ण फिल्म हललाई भत्काएर अहिले सो स्थानमा नयाँ व्यवसायिक संरचना निर्माण भैरहेको छ ।
फिल्म हलको इतिहास बोकेको यो ठाउँमा अहिले १४ तले होटेल बन्दै छ भने नयाँ प्रोजेक्टमार्फत चावहिललाई मनोरञ्जन, हस्पिटालिटी र सपिङ कम्प्लेक्सको नयाँ हब बनाउने गोपीकृष्णले जनाएको छ ।
गोपिकृष्ण सेन्ट्रल कम्प्लेक्स अर्थात जिकेसिसी नामाकरण गरिएको छ । अब गोपीकृष्णको नयाँ डिजिटल नक्सा तयार भएको छ । जिकेसीसी प्रबन्ध निर्देशक तथा फिल्म निर्माता नीरक पौडेल आफ्नो प्रोजेक्ट क्रिएटिभ हुनुपर्ने धारणा राख्छन् ।
सोहीअनुसार गोपीकृष्णको नयाँ डिजाइन सकिएको छ । गोपीकृष्णको आर्किटेक्ट डिजाइनदेखि संरचना निर्माणसम्मको काम चिनियाँ कम्पनीलाई दिइने भएको छ । आर्किटेक्ट डिजाइनको काम चिनियाँ कम्पनीले गरिरहेको छ ।
जिकेसिसी नाममै १४ मंसिर २०७८ मा उद्योग विभागमा कम्पनी पनि दर्ता भैसकेको छ । फेब्रुअरीदेखि सुरु हुने निर्माण दुईवर्षमा पुरा हुने भएको छ ।
जिकेसिसिको नयाँ ब्रान्डिङ अनुसार अब अहिले भैरहेका ओम, नमः र शिवायको नाम बदलिने भएको छ । हलको डेकोरेसन मात्र नभएर नाम पनि बदलिने भएको छ । नयाँ नाम रेड, ब्लू र ग्रीन हुनेछ । रेड हलमा सिट, कार्पेट, बाथरुम, फ्लोर, रेष्टुरेन्ट, लबी र लाइनिङ सबै रातो हुने भएको छ ।
ब्लूमा सबै नीलो र ग्रीनमा सबै हरियो तुल्याइने भएको छ ।
अब गोपिकृष्णको १४ तले भवनको नयाँ संरचना सबै स्टिल प्रविधिबाट बन्ने भएको छ । नेपालमा पहिलोपटक स्टिलबाटै यति ठूलो संरचना पहिलोपटक बन्न लागेको जनाइएको छ ।
नयाँ प्रोजेक्टबारे नीरक भन्छन् : मान्छेले पहिलो यस्तो ठाउँमा पनि फिल्म हल चल्छ र भन्थे । हामीले चलाएर देखायौं । नयाँ प्रोजेक्टमार्फत चाबहिललाई हस्पिटालिटी, मनोरञ्जन र सपिङको प्रिमियम डेस्टिनेसन बनाउनेछौं ।’
Leave a Reply