काठमाडौं । अमेरिकाले नेपालमा रहेका आफ्ना कम्पनीहरुका व्यवसायी प्रतिनिधिलाई समेटेर पहिलोपटक अमेरिकन चेम्बर अफ कमर्स (एमछम) गठन गरेको छ ।
अमेरिकी सहायक विदेशमन्त्री डोनाल्ड लू र उपसहायक विदेशमन्त्री केली किडरलिङको उपस्थितीमा एमछम घोषणा गरिएको हो ।
एमछमको शाखा विश्वभर फैलिएको र यसमा अमेरिकी चेम्बर अफ कमर्सका प्रतिनिधि रहने दूतावासले जनाएको छ । गठित एमछम कार्यसमिति १३ सदस्यीय रहेको काठमाडौंस्थित अमेरिकी दूतावासद्वारा जारी विज्ञप्तिमा उल्लेख छ ।
जसमा लोटस होल्डिंग्सका अजित शाह अध्यक्ष छन् । एमछमका सदस्यहरुमा मेटलाइफका निर्मल श्रेष्ठ, कम्प्लिएन्स क्वेस्टका अतुल्य रिसाल, लिपफ्रग टेक्नोलोजीका कैलाश बायनन्द, फोर्ड डिष्ट्रिब्युटर आकाश गोल्छा, हायातका जयदिन श्रेष्ठ छन् ।
साथै, फ्रस्ट एन्ड सुलिभानका मंगेशलाल श्रेष्ठ, क्याटरपिल डिष्ट्रिब्युटरका अस्कर बतास, पठाओ राइड सेयरिङका असिममान सिंह बस्न्यात, डेल डिष्ट्रिब्युटरका संजय गोल्छा, कारखानाका साकार पुडासैनी र लेगल एड्भाइजरका सीमान्त दाहाल छन् ।
हायात होटलमा सहायक विदेशमन्त्री लू एमछमका पदाधिकारीलाई भेट गरेका थिए । गरिबी घटाउन निजी क्षेत्रको महत्वपूर्ण भूमिका हुने उनले बताए । उपसहायक विदेशमन्त्री किडरलिङले औपचारिक अर्थतन्त्रमार्फत महिला सशक्तिकरण र अल्पसंख्यकको क्षेत्रमा काम गर्न सुझाइन् ।
Leave a Reply