ललितपुरमा आजदेखि १८ बर्ष माथिकालाई भेरोसेलको पहिलो डोज खोप लगाइँदै, विदेशी पर्यटकले पनि लगाउन पाउने

ललितपुर जिल्लामा आजबाट कोभिड–१९ विरुद्धको खोप लगाउन सुरु भएको छ । जिल्ला अन्तर्गतका खोप केन्द्रमा १८ वर्षमाथिका सबै नागरिकलाई कोभिडविरुद्धको भेरोसेल खोप लगाइने भएको छ ।

साथै, ललितपुर महानगर अन्तर्गतका २९ वटै वडामा पनि खोप लगाउन सुरु भएको छ । जिल्ला खोप समन्वय समितिको निर्णय अनुसार बुधबारबाट १८ बर्ष माथि उमेर समूहका सबैलाई भेरोसेलको पहिलो डोज दिन लागिएको हो । असोज २०, २१ र २२ गतेसम्म तीन दिन खोप लगाइने जनाइएको छ ।

कार्यालयका अनुसार चाडपर्वको समयमा भिडभाड बढ्न सक्ने र कोभिड–१९ फैलन सक्ने कुरालाई मध्यनजर गर्दै यस्तो निर्णय लिइएको स्वास्थ्य कार्यालय ललितपुरद्वारा जारी विज्ञप्तिमा उल्लेख छ।

जनस्वास्थ्यको मापदण्ड पालना गरी पालिकाले निर्धारण गरेको पायक पर्ने खोप केन्द्रमा पुगि खोप लगाउन समेत कार्यालयले विज्ञप्तिमार्फत आग्रह गरेको छ। राष्ट्रियता खुल्ने परिचयपत्र र पासपोर्टको आधारमा विदेशी पर्यटकलाई समेत खोप लगाइने भएको छ ।