मलेसियाबाट आज एकैदिन ल्याइयो ६ शवसहित १५ जनाको अस्तु (तस्बिर र भिडिओ)

काठमाडौं । वैदेशिक रोजगारीका लागि मलेसिया पुगेपछि विभिन्न कारणले मृत्यु भएका ६ जना नेपालीको शव आज नेपाल ल्याइएको छ । तीे शवसँगै १५ जनाको अस्तु पनि ल्याएर परिवारको जिम्मा लगाइएको छ ।

नेपाल र मलेसियास्थित जनउद्धार केन्द्रकोे पहलमा मृतकको शव नेपाल ल्याएर आफन्तलाई बुझाइएको हो । केन्द्र मलेसियाका स्वयंसेवक मुकुट रायमाझीका अनुसार २१ मृतकमध्ये एकजनाको शव २० वर्षअघि मलेसिया गई अहिलेसम्म नेपाल नफर्किएकाको समेत रहेको छ । उनको परिवारका एक सदस्यले बुबाको अनुहारै नदेखेको बताएपछि जनउद्धार केन्द्रको पहलमा शव नेपाल ल्याएको बताए ।

स्वयंसेवक रायमाझीले भने,‘२००२ मा उहाँ मलेशिया जानुभएको रहेछ, त्यसपछि उहाँ नेपालमा सम्पर्कबिहीन भएर बस्नुभएको रहेछ, उहाँ त्यहाँ इलीगल्ली बस्नुभयो, लगभग १९ वर्षसम्म बस्नुभयो, पछि छोराहरुसँग यहाँ सम्पर्क भएपछि टिकट काट्ने पैसासमेत छोराले दिएर यता ल्याने व्यवस्था गर्नुभएको रहेछ, त्यहाँबाट एयरपोर्ट आएपछि एयरपोर्टमै ढल्नुभएछ र पुलिसले काम गर्ने ठाउँमा लानु भनेपछि त्यहाँ जानुभयो, हस्पिटलमा बस्नुभयो, यो सम्पूर्ण काम मलेशियास्थित जनउद्धार केन्द्रले गर्यो, दुई तीन दिन हस्पिटलमा बसेपछि डेथ हुनुभयो, डेथ भइसकेपछि के गर्ने भन्ने कुरा आयो, त्यसपछि नेपालमा कान्छो छोराले मैले बुबालाई राम्रोसँग् देखेको छैन, म सानै हुँदा जानुभएको ल्याइदिनु म हेर्छु भनेपछि हामीले त्यो सबै खर्च व्यहोरेर नेपाल ल्याएका हौँ ।’

कानूनी र प्रक्रियागत झन्झटले गर्दा विदेशमा मुत्यु भएका व्यक्तिको शव ल्याउन अझै सहज भएको छैन । विदेशमा मृत्यु भएकाहरुको शव ल्याउनका लागि नेपाल सरकार र त्यहाँँस्थित जनउद्धार समितिले पहल गर्दै आएको छ । सरकारले मृतकका आफन्तको घरसम्म शवबाहनमा शव पुर्‍याउने गर्दै आएको छ ।