स्थानीय तहलाई लक्षित वर्गमा प्रत्यक्ष योगदान पुग्ने कार्यक्रम तर्जुमा गर्न सरकारको परिपत्र

काठमाडौं । सरकारले आगामी आर्थिक वर्षको बजेट विनियोजन गर्दा लक्षित वर्ग र समुदायलाई प्रत्यक्ष योगदान पुग्ने कार्यक्रम तर्जुमा गर्न सबै स्थानीय तहलाई परिपत्र गरेको छ । संघीय मामिला तथा सामान्य प्रशासन मन्त्रालयले ७ सय ५३ वटै स्थानीय तहलाई परिपत्र गर्दै आगामि आर्थिक वर्ष २०७८–०७९ को कार्यक्रम एवम बजेट निर्माण गर्दा लक्षित वर्ग र समुदायलाई विकासको मूलप्रवाहमा ल्याउनका लागि प्रत्यक्षरुमा योगदान हुने कार्यक्रम तर्जुमा गरी निश्चित प्रतिशत बजेट विनियोजना गर्ने व्यवस्था मिलाउन परिपत्र गरेको हो ।

महिला, जेष्ठ नागरिक, अपांगता भएका व्यक्ति, बालबालिका, किशोरकिशोरी लगायतलाई विकासको मूलप्रवाहमा ल्याई समावेशी र समतामूलक राष्ट्रको निर्माण गर्ने चालू पन्ध्रौ योजनाको संकल्प पनि रहेकाले यतातिर ध्यान दिन मन्त्रालयले आग्रह गरेको हो ।

मन्त्रालयले स्थानीयस्तर समेतबाट महिला, दलित, आदिवासी जनजाती, मधेशी, मुस्लिम, पिछडिएको समुदाय, बालबालिका, जेष्ठ नागरिक, अशक्त तथा अपांगता भएका व्यक्ति, सामाजिक, आर्थिक शैक्षिकरुपमा पछाडि परेका व्यक्ति तथा समुदाय लगायतलाई विकासको समग्र प्रक्रिया तथा प्रतिफलको हिस्सेदारीमा मूलप्रवाहिकरण गर्नका लागि बजेट तथा कार्यक्रममार्फत विधि प्रयास गरिएको पनि स्मरण गराएको छ ।