चिनियाँ खोपको प्रभावकारिता कम रहेको अधिकारीहरुको भनाई, डोज बढाउने तयारी

काठमाडौं । चीनकै एक स्वास्थ्य अधिकारीले आफ्नो देशमा निर्मित कोभिड खोपहरुको प्रभावकारिता कम भएको बताएका छन् । आइतबार आयोजित पत्रकार सम्मेलनमा स्वास्थ्य अधिकारी गाउ फूले प्रभावकारिता वृद्धि गर्नका लागि खोपहरूको सम्मिश्रण बनाउने विषयमा सोचिएको जानकारी दिए।

नेपालमा पनि चीनले अनुदानमा दिएको आठ लाख मात्रा कोभिड खोप अहिले लगाउन थालिएको छ। नेपालले सिनोफार्मले विकास गरेको भेरोसेल नामक कोभिडविरुद्धको खोप आपतकालिन रुपमा प्रयोग गरिरहेको छ ।

चीनले अहिलेसम्म चार प्रकारका खोपहरूलाई स्वीकृति दिएको छ जसमध्ये विदेशमा गरिएको परीक्षणमा केही खोपको प्रभावकारिता ५० प्रतिशतसम्म पनि देखिएको छ। नेपालमा चैत २५ गतेदेखि चिनियाँ खोप प्रयोगमा ल्याइएको छ ।

पछि गाउले सम्मेलनमा राखेको आफ्नो भनाइलाई गलत रुपमा लिइएको बताएका छन् । चीनमा १० करोडभन्दा बढी मानिसले स्वदेशमा निर्मित खोपको कम्तीमा एक मात्रा लगाएका छन्। चिनियाँ रोग नियन्त्रण केन्द्रका प्रमुख ग्वाओ फुले हाल उपलब्ध खोपहरूको सुरक्षा दर उच्च नरहेको बताएका थिए।

खोपको प्रभावकारिता वृद्धि गर्नका लागि खोपहरू मिसाउने विषयमा विचार गरिएको उनले बताएका थिए । उनले खोपको प्रभावकारिता वृद्धि गर्न डोजको सङ्ख्या परिवर्तन गर्ने र दुई मात्राबीच समयावधि बढाउने जस्ता कुराको चर्चा गरेका थिए ।

तर पछि उनले सरकारी पत्रिका ग्लोबल टाइम्सलाई संसारभरिका खोपहरूको सुरक्षा दर कुनै बेला कम र कुनै बेला बढी हुनेू बताए।