काठमाडौं । आफ्नी ८५ वर्षीया आमालाई ३ करोड रुपैयाँ ठगी गरेको आरोपमा नेपाल राष्ट्र बैंककी निर्देशक सुष्मा रिजाल रेग्मी पक्राउ परेकी छन् ।
राष्ट्र बैंकको कर्पोरेट प्लानिङ तथा रिस्क म्यानेजमेन्ट विभागकी निर्देशक रेग्मीलाई महानगरीय प्रहरी परिसर काठमाडौंको टोलीले पक्राउ गरेको हो ।
परिसरका प्रमुख एसएसपी अशोक सिंहका अनुसार सुष्माकी आमाले आफूलाई ठगेको भन्दै छोरीविरुद्ध उजुरी दिएकी थिइन् । सोही उजुरीका आधारमा पक्राउ गरी दुई दिनदेखि थुनामा राखिएको उनले जानकारी दिए ।
उजुरी अनुसार रेग्मीले विभिन्न बैंकमा भएको आमाको खाताको पैसासहित ३ करोडभन्दा बढीको सम्पत्ति आमाको हेरचाह गर्ने भन्दै आफ्नो नियन्त्रणमा लिएकी थिइन् । तर, पैसा लिएर आफ्नो वास्ता नगरेको आमाको आरोप छ ।
प्रहरीले उनलाई विगत ८ महिनादेखि आमाको राम्रोसँग हेरचाह गर्न वा आमाको सम्पत्ति फिर्ता गरिदिन अनुरोध गरे पनि नमानेको सिंहले बताए । रेग्मीविरुद्ध जेष्ठ नागरिक ऐन २०७३ अनुसार मुद्दा दर्ता भइ अनुसन्धान भइरहेको उनले जानकारी दिए ।
वयोवृद्ध आमाले छोरीमाथि मुद्दा हालेको यो दुर्लभ घटना हो ।
नेपाल राष्ट्र बैंकका प्रवक्ता देबकुमार ढकालले रेग्मी पक्राउ परेको बारे अनौपचारिक जानकारी रहेको बताए । ‘पक्राउ पर्ने व्यक्ति नेपाल राष्ट्र बैंककै कर्मचारी हो भन्ने सुनेको छु, बाँकी कुरा प्रहरीसँग बुझ्नुहोस,’ उनले भने ।
Leave a Reply